Hofsjökull (1765 m) er 925 km² hveljökull á miðhálendinu miðju, kenndur við Hof í Vesturdal í Skagafirði. Fyrrum var hann nefndur eftir Arnarfelli hinu mikla og hét Arnarfellsjökull. Hann er þriðji stærsti jökull landsins. Samkvæmt mælingum, sem Helgi Björnsson gerði á jöklinum, hvílir hann á stóru eldfjalli með geysistórri og djúpri, ísfylltri öskju. Hofsjökull er tiltölulega brattur og þar af leiðandi verða ferðamenn að gæta sín vel á sprungum. Meðal hinna mörgu og misstóru skriðjökla, sem ganga niður frá jökulhvelinu eru Múlajökull, Þjórsárjökull, Klakksjökull, Nauthagajökull, Blautukvíslarjökull, Blágnípujökull, Sátujökull og fleiri, sem eru nafnlausir. Mikið vatn kemur fá Hofsjökli á yfirborði, s.s. Blanda, Jökulsár eystri og vestari, Jökulfall og Þjórsá. Blönduvirkjun, Sultartangavirkjun og Búrfellsvirkjun eru byggðar að öllu leyti og að hluta á vatnsbirgðunum, sem eru bundnar í ísmassa jökulsins. Hofsjökull á sér lítinn nafna austan Vatnajökuls við jaðar Lónsöræfa.